[日本城🏯]唔係賣家品，點只古蹟咁簡單──日本城郭觀賞指南（一）城郭種類點樣分?

日本城郭有傳總共超過3萬座，由古代以柵欄圍繞嘅聚落，去到幕末參考歐洲現代風格設計而成嘅五稜郭，建築風格橫跨幾個世紀。

除左戰爭其間作為堡壘防禦，城郭一般都用市役所功能，即政府部門，因此居民方便性亦係城郭設計考慮要點之一。

現今大眾一般對日本古城印象包括石垣、天守、城牆等等，大多都來自戰國時期，由織田信長、豐臣秀吉等人帶領嘅建築風格，亦有佢地帶領住築城嘅潮流。

由於戰國時期城堡需求因應戰亂而增加，同時大名收入都漸漸增加，於是佢地都紛紛築起城郭保護自己領地，而依一批城就被稱為近世城。

依篇文章主要會為大家介紹近世城嘅唔同種類，主要為三大種：

🏯山城──戰國時代前嘅主流，起喺地勢較高嘅山，一般難以到達。

主要目的以軍事作用為主，利用險要嘅地理位置，令敵人難以靠近。同時亦確保有良好視野作防禦同反擊應變。

相反，由於戰國時期開始大名除左打仗亦要搞民生。遠離市街嘅山城就為政治同管理領地帶來不便，因此戰國時代唔少大名會喺山下另建居邸同行政部門，有事先番上山準備戰鬥，如此不便令山城慢慢喺戰國中後被淘汰。

山城大多一開始通常冇石垣，一般石垣都係戰國時期加建。

例子: 武田氏 要害山城、上杉氏 春日山城、朝倉氏 一乘谷城
 

🏯平山城──利用低海拔嘅山丘，依山脈而建，本丸同天守設喺山頂。

既有不亞於山城嘅防禦能力、亦有政治管理嘅方便性，係集便利與防禦於一身嘅設計，因此成為近世城郭中嘅主流。

平山城嘅天守通常設喺山丘頂，所以便於觀察市街周圍動靜，一旦有異狀可以快速應對。同時市民可以喺城下町清楚睇到領主城堡嘅氣勢，以鞏固權力。

平山城除軍事用途，亦能夠彰顯城主身份、作政治用途，因此為近世城常見的模式。
 

🏯平城──通常因附近冇合適地形(高山/山丘)而建於平地嘅城，平面面積通常極大。

平城最別於山城同平山城係多數使用堀(濠溝)作主要防禦手段，包括水堀(即護城河)及空堀作為主要防禦手段。相對而言方便藩士出入及領地管理，但相反防禦性能則要於設計時花更多心機。

現今的平城大多只剩二之丸及本丸區域，三之丸(再外圍)已被劃作其它用途。大部份都係政府部門、市役所、市立學校、運動場等等。

🏯水城──平城的分支，主要稱呼利用自然河川、水域作天然屏障的平城。

📷-本篇文章內所有相片均為本人攝影作品，如果想借用請知會本人。謝謝-📷

有冇咩關於城嘅想知? 又有冇咩城特別有興趣? 歡迎喺FACEBOOK、IG、BLOGGER度大家一齊討論下。🏯🏯🏯

🗾如果覺得寫/影得唔錯嘅，不如去FACEBOOK同IG比個FOLLOW比個LIKE。你嘅支持係我繼續創作嘅動力。

IG: https://www.instagram.com/budtourhk/

FACEBOOK:https://www.facebook.com/Budtourhk

Blog:https://budtourhk.blogspot.com/

FACEBOOK：